كيفية دهان الحوائط الجافة مثل المحترفين

المؤلف:

بعض النصائح من كناوف لمساعدتك في دهان الحوائط الجافة بنفسك
كتير مننا ميعرفش إن دهان الحوائط الجافة سهل جدا، و ده أكيد ممكن يشجع ناس كتير إنهم يدهنوا الحوائط بنفسهم عشان يوفروا في التكلفة. و طبيعي إنك تتبسط لما توفر في الميزانية اللي كنت هتدفعها لمقاولين الدهانات و النقاشين، و كمان تتبسط لما تقدر تعمل شغل الدهان لوحدك و من غير مساعدة.
لو قررت فعلا إنك تعتمد علي نفسك في دهان الحوائط الجافة في بيتك، يبقي لازم تعرف الأول بعض المعلومات و النصايح اللي هتساعدك كتير في إنك تحصل علي النتيجة اللي بتتمناها:

من المهم جدا تنضيف الحوائط الجافة من أي أتربة أو غبار قبل البدء في الدهان، خصوصا إن الحوائط الجافة في بعض الأماكن زي في المطبخ و الحمام بيكون عليها بقايا زيوت أو صابون، و دي بيكون لها تأثير سلبي علي الدهانات. طريقة التنضيف: بالنسبة لحوائط الغرف يفضل مسح الأتربة و الغبار بقطعة قماش نضيفة، أما بالنسبة للمطابخ و الحمامات فبينصح باستخدام كمية قليلة من أي منظف عادي علي قطعة قماش لإزالة البقايا الملتصقة بالحوائط. بالنسبة للحوائط القديمة: ينصح بصنفرة أي زوائد أو بروزات بالإضافة إلي غلق الثقوب الصغيرة، و ممكن تعمل ده باستخدام رقع الحوائط الجافة المتوفرة عند محلات الأدوات و المعدات. أكيد مش هتتبسط لما تخلص الدهانات و تلاقي أثاث بيتك الجميل مبقع من الدهان، عشان كده خطوة تغطية الأثاث قبل ما تبدأ شغل الدهانات هي خطوة مهمة جدا. تقدر تغطي قطع الأثاث بمفارش بلاستيك، و كمان غطي الأرضيات بقطع من القماش عشان تمتص أي بقع بتنزل أثناء الدهان. لازم تستخدم برايمر مناسب للحوائط الجافة (البرايمر عبارة عن مادة بيتم دهانها علي الحوائط قبل الدهانات، و هي مهمة لإعطاء أفضل النتائج و لتقليل كمية الدهان المستخدمة). البرايمر فكرته إنه بيقفل المسام الموجودة علي سطح الألواح الجبسية، و بالتالي بيجهزها للدهان.

دلوقتي لازم تقرر هتستخدم أي طريقة للدهان...هل هتستخدم الرش ولا الدهان بالفرشاة؟ كل طريقة لها مميزاتها و عيوبها اللي لازم تعرفهم عشان تقرر إيه اللي هيناسبك أكتر. الطريقة الأسهل و الأسرع هي الرش، لكنها في نفس الوقت بتنشر بقع الدهان في كل مكان. عشان كده لو عايز تتجنب التنضيف بعد شغل الدهانات يبقي الأفضل استخدام الفرش و الرولات. استخدم الرول لدهان المساحات الكبيرة في الحوائط أولا، و بعدها استخدم الفرشاة لدهان أطراف الحوائط و وضع لمساتك الأخيرة. ممكن كمان تطلب نصيحة محل الدهانات اللي بتتعامل معاه عن أنواع الدهانات المناسبة لاحتياجاتك. فيه أنواع كتيرة و مختلفة للدهانات في السوق و طبعا كل نوع له مميزات و عيوب، فمثلا بعض الدهانات بيكون تطبيقها سهل جدا و دي مناسبة للمبتدئين، و فيه أنواع تانية بتتميز بسهولة التنضيف و دي بتكون عملية في المطابخ و الحمامات. أقصي مدة للانتظار بعد دهان طبقة البرايمر علي الحوائط هي يومين، و بعدها بيتم دهان أول طبقة من الدهانات. و يفضل الانتظار لفترة قبل دهان الطبقة التانية (ممكن توصل يومين) و ده للتأكد من جفاف الدهان. بينصح كمان بصنفرة أي زوائد في الطبقات السابقة قبل دهان الطبقة التانية. استخدم نوعيات جيدة من الفرش و الرولات و الأدوات للحصول علي افضل النتائج.

ابدأ دلوقتي في دهان منزلك و احكيلنا عملت ايه....احنا في انتظار الصور????