إزاي توفر فلوسك و انتا بتشتري الدهانات؟

المؤلف: الدهانات

لو كانت ميزانيتك محدودة و في نفس الوقت عايز تجدد مظهر بيتك، إيه الحل؟ فيه طرق اقتصادية كتير ممكن تلجأ لها، أوفرها علي الإطلاق هو تجديد الدهانات و طلاء الحوائط. لكن هل طلاء الحوائط دايما هو الاختيار الأقل سعرا؟ الإجابة لا! لأن بالرغم من إنه خيار اقتصادي...إلا إنك ممكن تخرج من محل الدهانات و انتا دافع فلوس كتير....يا تري ليه؟ و إزاي نتغلب علي المشكلة دي؟

• لازم تشتري الحاجات اللي انتا محتاجها بس...لو اشتريت كل الحاجات اللي عاجباك هتصرف أكتر مما تتوقع. حدد أولوياتك واحتياجاتك قبل ما تنزل من البيت و متشتريش حاجه زيادة... مش بس بالنسبة للدهانات، لا و حتي الفرش و الرولات.
  
  
• إمتي أشتري الدهانات؟ محلات الدهانات كل فترة بتعمل تخفيضات كبيرة. استني الوقت ده وانزل اشتري الكميات اللي انتا محتاجها بأسعار مناسبة.
  
  
• لو ما كنتش عارف كمية الدهانات اللي أنا محتاجها؟ يبقي لازم تاخد مقاسات مظبوطة لحوائط بيتك و لازم تحسب كمية الدهان بدقة عشان ميكونش فيه نقص و لا إهدار.
  
  
• هل لازم أشتري برايمر؟ لا مش لازم...بس الأحسن إنك تشتريه...عارف ليه؟ لأن لو حوائط بيتك قديمة وفكرت تدهنها بدون برايمر... الحوائط حتتشرب الدهان وهتكون مضطر تدهنها مرة تانية و ده طبعا شيء مش اقتصادي بالمرة. يبقي الحل في الحالة دي إنك تدهن طبقة البرايمر الأول وتسيبها تنشف وبعدين تكمل بالدهانات.
  
  
• أنا حشتري دهانات رخيصة عشان أوفر فلوس...لا استني متعملش كده! البويات اللي جودتها كويسه بتوفر لك في الفلوس...طب إزاي؟ لأنها بتعمل تغطية أحسن و بتقعد سنين طويلة بدون ما تتغير...علي عكس الدهانات الرديئة اللي بتكون محتاج منها كميات كبيرة عشان تعالج مشاكل تغطيتها، ده غير إنها بتتغير في اللون و الشكل بمرور الوقت.